Kryeministri i Greqisë, Kyriakos Mitsotakis, ka shprehur falënderime për shtetin e Shqipërisë, për ndihmën e dhënë nga kjo e fundit ndaj në përballimin e situatës nga zjarret në shtetin helen.
“Falënderimet tona shkojnë për Shqipërinë, që dërgoi në Greqi 48 zjarrfikës dhe 9 automjete për t’u bashkuar me ne për të luftuar zjarret në Aleksandropoli. Faleminderit Shqipëri”, shkroi Mitostakis në një postim në Twitter.
Për të ndihmuar shtetin grek pasditen e së mërkurës nga Shqipëria janë nisur më shumë se 60 trupa të shërbimeve zjarrfikëse, si dhe 10 mjete të forcave të armatosura dhe sistemit të mbrojtjes civile shqiptare, raporton euronews.al.
Forcat ishin të gatshme për të kaluar në anën tjetër të kufirit, por një përgjigje e Sistemit Evropian të Mbrojtjes Civile thoshte se vendet e BE-së kishin plotësuar nevojën për trupat tokësore. Por disa orë më vonë i njëjti sistem ka dhënë një tjetër përgjigje që bën të ditur se forcat Shqiptare do të kalojnë drejt Greqisë për t’iu bashkuar mjeteve zjarrfikëse dhe trupave këmbësorë që janë duke marrë pjesë në shuarjen e zjarreve në Greqi.
