Komisioni Zgjedhor Republikan i Serbisë ka shpallur të martën rezultatet përfundimtare të zgjedhjeve parlamentare të mbajtura më 3 prill. Dhe sipas këtyre rezultateve, shqiptarët do të kenë edhe në këtë mandat një përfaqësues – Shaip Kamberin.
Në fakt, çështja e mandatit të deputetit shqiptar zvarriti me muaj këtë proces. Zgjedhjet në Tërnovc të Madh të Preshevës, u mbajtën pesë herë dhe në të fundit, Kamberi fitoi votat e nevojshme edhe për një mandat.
Në katër herët e para, zgjedhjet në këtë pikë ishin anuluar, herë me ankesë të shqiptarëve e herë me ankesë të partisë së Ivica Daçiqit.
Me marrjen e mandatit nga Kamberi, partia e Daçiqit, SPS, ka mbetur me “një mandat më pak”. Më 3 prill, në Serbi ishin mbajtur edhe zgjedhjet presidenciale dhe një pjesë lokale.
