Zëvendëskryeministri për Çështje Europiane, Bojan Mariçiq në “Summer Click” në TV21 tha se duhet t’u jepet mirënjohje partive politike shqiptare në Maqedoninë e Veriut për mbështetjen që i kanë dhënë vazhdimisht bashkëqytetarëve maqedonas në betejën për marrëveshje me Bullgarinë.
“Ia vlen që të thuhet, me të vërtet t’u jepet mirënjohje partive politike shqiptare për mbështetjen dhe solidaritetin me qytetarët maqedonas, me popullin maqedonas dhe me partitë që i përfaqësojnë maqedonasit, sepse me të vërtet kemi ndjerë një mbështetje të fuqishme gjatë gjithë kësaj kohe, deri sa po bëhej beteja me Bullgarinë që të marrim ndonjë formë të marrëveshjes, do të thotë pozicionet tona në këtë aspekt kanë qenë të forcuara me mbështetjen e partive politike shqiptare dhe në asnjë moment nuk ka qenë dobësi që kemi numër serioz të partive nga përkatësi të ndryshme etnike, ndërsa Bullgaria në fazë të caktuar mendonte, disa politikanë bullgarë menduan se kjo mund të jetë pengesë, për fatin tonë u tregua shoqëria jonë”, theksoi Mariçiq.
