Ish presidentë nga vendet e rajonit besojnë në perspektivën evropiane të Ballkanit Perëndimor. Sipas tyre, me luftën në Ukrainë ka një kontekst të ri gjeostrategjik ndryshe nga më parë, dhe Bashkimi Evropian tani po ndryshon. Ish-presidenti serb Boris Tadiq beson se e ardhmja evropiane varet nga konfliktet, të tilla si agresioni rus dhe marrëdhënia Kinë-SHBA, ndërsa rajoni nuk ka alternativë tjetër veç anëtarësimit në BE. Ai tha se Beogradi ka pritur të hynte në BE menjëherë pas rënies së regjimit të Sllobodan Millosheviqit.
“Këtu është pika e dobët e sigurisë evropiane. Përndryshe, nuk mendoj se Evropa do të jetë mjaft e sigurt dhe e fortë për t’u përballur me sfidat në të ardhmen. Vetëm një Evropë e integruar do të jetë në gjendje të jetë konkurruese në nivel global”, deklaroi Boris Tadiq – ish-President i Serbisë.
Për ish-presidentin shqiptar, Bamir Topi, ka edhe një qëllim të vetëm për të gjitha vendet e rajonit. Por, siç tha ai, për të arritur këtë qëllim, fqinjët duhet të bashkëpunojnë dhe të kenë dialog.
“Ne nuk kemi asnjë problem me qëllimin tonë përfundimtar, është Brukseli. Por ne duhet të punojmë për reformat dhe së bashku, sa më shpejt të jetë e mundur, do të arrijmë në Bruksel dhe familjen evropiane”, tha Bamir Topi – ish-President i Shqipërisë.
Ish kreu i shtetit bullgar, Petar Stojanov, theksoi se anëtarët e BE-së nuk lejojnë që konfliktet nga e kaluara të kalojnë të ta. Sipas tij, është e rëndësishme të kemi një qëllim të bashkëjetesës në Evropë, ku shumë kombe jetojnë së bashku pa humbur identitetin e tyre. Stojanov kujtoi se lufta në Ukrainë i dha një shtysë të re procesit të zgjerimit.
“Ju nuk duhet të humbni besimin se Maqedonia do të jetë anëtare e Bashkimit Evropian. Kjo është e sigurt dhe ne të gjithë e besojmë këtë”, u shpreh Petar Stojanov – ish-President i Bullgarisë.
Politikanët nga rajoni paraqitën pikëpamjet e tyre mbi perspektivën evropiane të Ballkanit Perëndimor në Forumin për Diplomaci Kulturore në Shkup, të organizuar nga ish-presidenti Gjorge Ivanov. /Alsat.mk
