Drejtori i Arsimit në Fushë Kosovë, Fatlum Berisha është deklaruar lidhur me rastin e një video të publikuar, ku pretendohet se është ushtruar dhunë ndaj një fëmije trevjeçar nga dy edukatore dhe kuzhinierja e kopshtit.
Berisha teksa foli për rastin, tha se ende nuk mund të vlerësohet nëse fëmija ka pësuar dhunë.
Ai shtoi se janë duke u marrë me rastin dhe do të veprojnë konform ligjeve.
“Sot në mëngjes DKA është informuar nga drejtoresha e çerdhes për një situatë e cila e ka bërtitura përmes rrjeteve sociale që është bërë një publikim dje nga një familjar, ku sipas pretendimeve të një fëmijë, i cili është përdorur dhunë ndaj tij, dhe unë kam qenë këtu bashkë me Policinë e Kosovë, me drejtoreshën dhe Inspektoratin e Arsimit dhe për hapat në vazhdim do të jemi në bashkëpunim të plotë me të gjitha organet kompetente të cilat merren me këtë çështje”, tha Berisha.
Berisha tha se të njëjtit persona që pretendohet të jenë përfshirë në rast, janë duke u intervistuar në Polici.
“Policia e Kosovë ka bërë ftesën më drejtim të edukatorëve të cilat pretendohet se janë të përfshira në rastin dhe këto momente veçse janë në stacionin e Policisë, duke u intervistuar të gjithë akteret se pretendohet se janë në rast dhe Policia ishte këtu prezent. Ne i ndihmuam në çdo moment, kanë sekuestruar edhe pajisjet e kamerave, kështu për hapat në vazhdim do të jemi në kordinim të plotë me Policinë e Kosovës dhe Inspektoratin e Ministrisë së Arsimit…Ligji është i barabartë për të gjithë, pavarësisht se kush është i përfshirë, në momentin që ne kemi vendim final dhe cilësohet si fajtor, masat do të jenë konform ligjit”, shtoi Berisha.
I pyetur nëse ka pas ankesa nga familjarë të tjera për raste të ngjashme, i njëjti ka mohuar këtë.
“Nuk ka pas raste të tjera, besoj se po pretendohet se është dhunë por nuk kisha me quajt dhunë deri në momentin vërtetohet prej eksperteve. Cilën video ke parë të rrah fëmijën? Nuk jam ekspert të vlerësojë, presim organet kompetente dalin me vendimin final. DKA do të merr të gjitha masat konform ligjit…Janë organet kompetente që do të vendosin dhe ne do të qëndrojmë prapa. Nuk i kemi pezulluar në këto momente sepse janë duke u intervistuar në Polici, do të respektojmë ligjin, s’ka alternativë tjetër”, përfundoi Berisha.
Zëdhënësja e Policisë për rajonin e Prishtinës, Flora Ahmeti i ka thënë KosovaPress-it, se policia në koordinim me prokurorinë, qendrën për punë sociale janë duke u marrë me rastin dhe ende është faza fillestare e hetimit.
Ministrja e Arsimit, Arbërie Nagavci tha se gjatë ditës pret raportet dhe se inspektorët e arsimit janë në çerdhen ku është ushtruar dhunë ndaj një fëmijës 3-vjeçar.
“Inspektorët e arsimit tashmë janë aty. Pres që të merren të gjitha masat. Jam tejet e shqetësuar, duket se ky nuk është rast i izoluar. Shihet se janë më shumë se një person që kanë qëndruar indiferent ndaj rastit”, deklaroi ajo.
