Pavarësisht se i duhet të qëndrojë për 7 muaj jashtë fushave të blerta, pasi u përfshi në vënien e basteve sportive, sërish “bardhezinjtë” e Juventus duket se nuk dëshirojnë të heqin dorë nga 22-vjeçari i mesfushës, Nikolo Faxhioli.
Sipas raportimeve më të fundit të mediave italian, bordi i “Zonjës së Vjetër” ka arritur një marrëveshje për zgjatjen e kontratës së talentit italian, deri në vitin 2028, pavarësisht se ky i fundit rikthehet në fushë, vetëm në fundin e këtij sezoni.
Mesfushori ka pranuar se vinte baste, por bashkëpunoi me autoritetet gjatë hetimeve dhe kërkoi ndihmë për të trajtuar varësinë e tij nga bixhozi e për këtë arsye klubi nga Torino, e ka mbështetur mesfushorin, i cili ka vazhduar stërvitjen me pjesën tjetër të ekipit, si dhe nuk ia ka cënuar rrogën e tij.
Deri më tani, nuk janë zbuluar ende detaje të kontratës, por pritet që të ketë një rritje të konsiderueshme të pagës së tij, teksa kujtojmë se marrëveshja aktuale e 22-vjeçarit, me “bardhezinjtë” skadonte në vitin 2026 dhe përfitonte vetëm 1 milionë euro në sezon.
