Dega e BDI-së në Dibër mbajti mbrëmë Kuvendin Zgjedhor, në të cilin u zgjodhën organet e reja të degës, ndërsa për kryetar u zgjodh Burtint Sela.
Kryetari i BDI-së, Ali Ahmeti, tha se partia mbetet e përkushtuar që në Maqedoninë e Veriut të zbatohen Marrëveshja e Ohrit dhe Marrëveshja e Prespës, si dhe të ruhen marrëdhënie të mira me shtetet fqinje. “Ne duam një Maqedoni të Veriut ku të gjithë qytetarët të jenë të barabartë. Kushtetuta që kemi është e bazuar në Marrëveshjen e Ohrit dhe është e garantuar nga Amerika, Evropa dhe NATO. Prandaj askush nuk mund ta zhbëjë atë. Shqiptarët lirinë e fituan me gjak. Sot dikush thotë se na duhet një marrëveshje e re. Jo, Marrëveshja e Ohrit është e garantuar ndërkombëtarisht dhe duhet të respektohet plotësisht”, tha Ahmeti.
Një pjesë të madhe të fjalimit të tij në Kuvendin Zgjedhor të degës së BDI-së në Dibër, Ahmeti ia kushtoi kritikave ndaj partnerit shqiptar në Qeveri. Ai i cilësoi përfaqësuesit e VLEN-it si të pafuqishëm për të realizuar të drejtat e shqiptarëve. “VLEN para zgjedhjeve premtoi shumë, por nuk ka bërë asgjë. Ata dështuan edhe me Ligjin për Përdorimin e Gjuhëve, i cili nuk është aspak ligj që mbron interesat e shqiptarëve”, deklaroi Ahmeti.
Ahmeti kritikoi edhe partitë maqedonase VMRO-DPMNE dhe LSDM, duke thënë se ato vazhdojnë të bëjnë gabime të mëdha në raport me pozitën e shqiptarëve. “Këto parti maqedonase duan t’i kenë shqiptarët në Qeveri siç i quajnë ata ‘të urtë’, e jo shqiptarët e BDI-së, të cilët i etiketojnë si ‘terroristë’”, tha Ahmeti.
Në aktivitetin partiak foli edhe deputetja e Dibrës në Kuvendin e Maqedonisë së Veriut, Arbana Pasholli, e cila kritikoi ashpër VLEN-in. Sipas saj, kjo parti ka degraduar pozitën e shqiptarëve në vend.
